मुम्बई इन्डियन्स आईपीएल टी ट्वान्टी क्रिकेटमा आज भएको खेलमा बिजयी भएको छ । आज भएको खेलमा मुम्बईले राजस्थान रोयल्सलाई ८ विकेटले पराजित गर्दै प्ले अफको संभावना कायमै राखेको छ । राजस्थानले मुम्बई समक्ष ९१ रनको अत्यन्तै सामान्य लक्ष्य प्रस्तुत गरेको थियो । उक्त लक्ष्य मुम्बईले ८ ओभर २ बलमा मात्र २ विकेट गुमाएर पूरा गर्यो । मुम्बईको जितमा इशान किशनले अविजित रहदै ५० रनको अर्धशतकीय इनिङ्स खेले ।
यस्तै कप्तान रोहित शर्मा २२, सूर्यकुमार यादव १३ र हार्दिक पाण्डयले अविजित ५ रनको योगफल बनाएका थिए । राजस्थानका मुस्ताफिजुर रहमान र चेतन साकरियाले एक एक विकेट लिएका थिए । पहिले ब्याटिङ गरेको राजस्थानले २० ओभरमा ९ विकेट गुमाएर ९० रनको स्कोर खडा गरेको थियो । राजस्थानका इभिन लेविसले सर्वाधिक २४, डाभिड मिलर १५ र जैसवाल र राहुल टेवाटियाले समान १२ रन जोडे ।
मुम्बईका लागि भने नाथन कल्टर निल एक्लैले ४ विकेट लिए । जेम्स निशमले ३ तथा जस्प्रित बुम्राहले २ विकेट लिए । मुम्बई १३ खेलमा १२ अंक जोडेर पाँचौं स्थानमा उक्लिएको छ । राजस्थान १० अंक जोडेर सातौं स्थानमा रहेको छ ।
