काठमाडौँ १८ असोज । प्रतिलिपि नागरिकताको बनाउनका लागि आएका सेवाग्राहीसँग घुस लिएको अभियोगमा अख्तियार दुरुपयोग अनुसन्धान आयोगले एक जनालाई पक्राउ गरेको छ ।
पक्राउ पर्नेमा जिल्ला प्रशासन कार्यालय धनुषामा कार्यरत नासु उमेश कुमार चौधरी रहेका छन् । उनले सेवाग्राहीसँग नागरिकताको प्रतिलिपि बनाउन ८ हजार ५ सय रुपैयाँ घुस लिएको आयोगले जनाएको छ ।
अख्तियार दुरुपयोग अनुसन्धान आयोगको कार्यालय बर्दिवासबाट खटिएको टोलीले चौधरीलाई सेवाग्राहीसँग घुस लिइसकेको अवस्थामा पक्राउ गरेको हो ।
आयोगले दिएको जानकारी अनुसार चौधरी माथि भ्रष्टाचार निवारण ऐन, २०५९ को दफा ३ को उपदफा (१) बमोजिम कारबाही हुने भएको छ ।
