काठमाडौं असोज १७ । नेकपा (एकीकृत समाजवादी) की सचिव रामकुमारी झाँक्रीले नेकपा एमालेका अध्यक्ष केपी शर्मा ओलीको स्तुतिगान र जयजयकारले नै एमाले सकिने बताएकी छन् । आज बिहान एक कार्यक्रममा सहभागी भएकी नेतृ झाँक्रीले विश्व कम्युनिस्ट आन्दोलन व्यक्तिपूजा गरेर नै ध्वस्त भएको बताउँदै यस्तो जनाएकी हुन् ।
‘विश्व कम्युनिस्ट आन्दोलन व्यक्तिपूजा गरेर नै ध्वस्त भएको हो । एमालेको कुम्भमेलामा पनि विचारविहीनको व्यक्तिपूजा गरिएको छ । अग्ला अग्ला पुत्लामुनि बिचरा मनुष्यहरु ङिच्च हाँसेर फोटो खिचिरहेका छन् । यस्तो दक्षिणपन्थी विसर्जनवाद कथा र फिल्ममा देखिएको थियो । त्यो हेर्दा हाम्रो विद्रोह सार्थक भएको प्रस्ट छ’ झाँक्रीले भनिन् ।
अलौकिक शक्तिको पूजा अन्धविश्वास हो, यसले आज विचार, सिद्धान्त, नीति र आदर्श मरिसकेको छ बताएकी उनले कार्यकर्तालाई चाकर र दासका रुपमा विकास गरिएको आरोप लगाएकी छन् ।
एमाले भत्कँदै छ, हामी नयाँ बन्दै छौं भन्दै उनले भनिन् , ‘ओलीको अकर्मव्य, निरंकुश, अहंकारी चरित्रका कारण एमालेलाई आगामी निर्वाचनबाट सिंहदरबार प्रवेशको बाटो बन्द भएको छ । दुई तिहाइको जनादेश कुल्चेको व्यक्तिलाई जनताले पटकपटक मौका दिँदैनन् ।’
आगामी निर्वाचनमा एमाले र ओलीका लागि सिंहदरबारमा ढोका बन्द हुने दावी गरेकी उनले गठबन्धनमार्फत संविधान बचाउन आफ्नो पार्टी कठिबद्ध रहेको र सरकारले चाँडै पूर्णता पाउने बताएकी छन् ।
