काठमाडौं असोज १५ । नेकपा एमालेका नेता खिमलाल भट्टराईले माधव नेपालले कांग्रेसको टेको खोजेर हिँडेको आरोप लगाएका छन् । आज बिहान एक कार्यक्रममा सहभागी भएका भट्टराईले नेपालको वास्तविक हालत आगामी चुनावमा देखिने बताएका उनले यस्तो बताएका हुन् ।
मुस्किलले पाँच सात प्रतिशत लागेको नेपाल भीरबाट लडिसकेकाले अब उनलाई रामराम भन्ने पनि कोहि नभएको बताएका छन् । उनले कार्यक्रमा भने , ‘माधवकुमार नेपाल कांग्रेसको टेको खोजेर हिँड्नुभएको छ । उहाँ आफैंले भनिसक्नुभएको छ, भीरबाट धकेल्नेहरुलाई कतै देखिनँ । उहाँ साँच्चै भीरबाट लडिसक्नुभयो, उहाँलाई राम राम भन्ने कोही पनि छैन । अब चुनावमा देखिहाल्नुहुन्छ ।’
नेपाल समुह चोइटिँदा एमालेलाई केहि धक्का लागे पनि आगीमा चुनावबाट फेरि एमालेनै सत्तामा आउने समेत भट्टराईले दावी गरेका छन् । ‘विधान महाधिवेशनपछि एमाले जागेर आउँछ । निकट भविष्यमा सिंहदरबारको ढोकामा एमाले नै आउँदै छ ।’
एमालेमा अहिले कुनै पनि फरक मत नभएको भन्दै उनले जबजलाई समयानुकूल विकसित गर्दै लैजाने कुरामा आफुहरु सहमत भएको पनि जनाएका छन् । ‘केपी शर्मा ओली हाम्रो अध्यक्ष हो, आगामी महाधिवेशनबाट आउने पनि उहाँ नै हो, आगामी चुनावमा पनि हामी उहाँकै नेतृत्वमा जान्छौं । अब विचार, कार्यनीति, रणनीति र नेतृत्वमा कुनै समस्या छैन । यो एकताबद्ध पार्टी हो, यो गुट र मोर्चा होइन । केन्द्रीय संसद्मा पनि एमाले ठूलो दल हो । प्रदेशहरूमा पनि एमाले नै ठूलो दल हो । बहुसंख्यक स्थानीय निकायहरुमा एमालेकै नेतृत्व छ ‘ उनले भने ।
कार्यक्रममा उनले एमालेको महाधिवेशन सुरु हुन लागकाले सरकारबाट आजबाट सभा सम्मेलन नगर्न आदेश दिएको समेत आरोप लगाएका छन् ।
