नयाँ दिल्ली, ६ असोज-राष्ट्रसंघको ७६ औं महासभालाई सम्बोधन गर्न भारतीय प्रधानमन्त्री नरेन्द्र मोदी न्युयोर्क प्रस्थान गरेका छन् । मोदीले यही सेप्टेम्बर २५ मा महासभालाई सम्बोधन गर्ने कार्यक्रम छ । सम्बोधनअघि मोदी अमेरिकी राष्ट्रपति जोन बाइडेनले ह्वाईट हाउसमा आयोजना गर्ने क्वाडको पहिलो सम्मेलनमा सहभागी हुनेछ । क्वाड सम्मेलनमा मोदीबाहेक जापानी प्रधानमन्त्री योसिहिदे सुगा र अस्ट्रेलियाका प्रधानमन्त्री स्कट मोरिसन पनि सहभागी हुनेछ । अमेरिकासहित यी तीन देश क्वाडका सदस्य हुन् ।
२४ सेप्टेम्वरमा हुने सम्मेलनमा कोभिड १९ र जलवायु परिवर्तनबारे छलफल हुनेछ । त्यस्तै, एशियाकै शक्तिशाली देश चीनको यस क्षेत्रमा बढ्दो प्रभावबारे पनि सम्मेलनमा छलफल हुनेछ । क्वाडलाई बाइडेन प्रशासनले निकै महत्वका साथ हेरेको ह्वाईटहाउसका प्रेस सचिव जेन पिसाकीले जानाकारी दिए । सम्मेलनमा हिन्द–प्रशान्त क्षेत्रमा अमेरिका, वेलायत र अस्ट्रेलियाले गरेको अकस सम्झौताबारे समेत छलफल हुने जनाइएको छ । कोभिड नियन्त्रणमा सदस्य राष्ट्रहरुले गरेको पहलबारे पनि सम्मेलनमा मुल्यांकन गरिनेछ हुनेछ । त्यस्तै, जलवायु परिवर्तन, साइवर स्पेस, प्रविधिलगायतका विषयमा पनि छलफल हुनेछ ।
