कास्की, २१ कात्तिक : सार्वजनिकस्थल र सडकपेटीमा कष्टपूर्ण जीवन बिताइरहेकाको उद्धार गर्ने उद्देश्यले मानव सेवा आश्रमले सञ्चालन गरेको मेची–महाकाली राष्ट्रिय उद्धार यात्रा अभियान आज गण्डकी प्रदेशको राजधानी पोखरामा आइपुगेको छ ।
सो अभियानका क्रममा पोखरा महानगरपालिकाका विभिन्न वडाबाट गरी सात जना सहयोगापेक्षी सडकआश्रित मानवको उद्धार गरिएको मानव सेवा आश्रमका केन्द्रीय अध्यक्ष रामजी अधिकारीले जानकारी दिनुभयो । उहाँका अनुसार छ जना पुरुष र एक जना महिलालाई उद्धार गरी मानव सेवा आश्रमको हेमजा सेवा केन्द्रमा गृहप्रवेश गराइएको छ । राष्ट्रिय उद्धार टोलीले बुधबार दिनभर पोखरा महानगरपालिकाका विभिन्न स्थानमा रहेका सहयोगापेक्षी मानवको उद्धार सेवामा खटिएको थियो ।
‘यो पटकको चाडपर्वमा कसैले बस्न नपरोस् सडक पेटीमा’ भन्ने मूल नाराका साथ मानवसेवा आश्रम र आनी छोइङ डोल्मा फाउन्डेसनको संयुक्त आयोजनामा गत असोज २८ गतेदेखि झापाको मेचीनगरदेखि उद्धार यात्रा सुरु भएको अधिकारीले जानकारी दिनुभयो ।
यात्राको २४ औँ दिन कास्कीको पोखरासम्म आइपुग्दा एक सय ७७ जना सडकआश्रित मानवको उद्धार गरिएको आश्रमका गण्डकी प्रदेश संयोजक होमनाथ तिमिल्सिनाले जानकारी दिनुभयो । उद्धार गरिएकामा एक सय ३५ जना पुरुष र ४२ जना महिला छन् । त्यसमध्येमा पाँच बालिका र चार बालक रहेको बताइन्छ ।
यसैगरी मेची–महाकाली राष्ट्रिय उद्धार टोली बिहीबार तनहुँ र गोरखाका विभिन्न क्षेत्रमा रहेका सडकआश्रित मानवको उद्धार सेवामा खटिने कार्यक्रम रहेको जनाइएको छ । मानव सेवा आश्रमको देशका सात प्रदेशका १९ जिल्लामा २५ वटा सेवा केन्द्र सञ्चालनमा छन् । आश्रमले विसं २०८२ भित्र नेपाललाई सडक पेटी र सार्वजनिकस्थलमा कष्टपूर्ण जीवनयापन गर्न नपर्ने मानिसको देश निर्माण गर्ने सङ्कल्प गरेको छ ।
