नुवाकोट- गाईभैँसीमा लाग्ने विषाणुजन्य लम्पी स्किन रोगविरुद्ध जिल्ला पशु सेवा कार्यालय नुवाकोटको आयोजनामा नुवाकोटसहित रसुवामा सप्ताहव्यापी खोप अभियान सुरू भएको छ ।
कार्यालय प्रमुख वरिष्ठ पशु विकास अधिकृत डा रामप्रकाश प्रधानले शुक्रबार विदुर नगरपालिका–६ स्थित मल्ल बहुउद्देश्य कृषि फार्ममा पालन गरेका भैँसीमा खोप लगाएर अभियानको सुरू गर्नुभयो । जन्मेको तीन महिनाभन्दा माथिका बिरामीबाहेक सबै गाईभैँसीलाई खोप लगाउन खोपकर्ता परिचालन गरिएको प्रधानले जानकारी दिनुभयो । दुई जिल्लाका किसानले पालेका सम्पूर्ण गाईभैँसीलाई निःशुल्क खोप लगाउन १० हजार डोज खोपसहित ३१ जना खोपकर्ता परिचालन गरिएको उहाँले बताउनुभयो ।
अभियानअन्तर्गत दुई जिल्लाका करिब २५ हजार गाईभैँसीलाई समेट्ने लक्ष्य लिइएको छ । नेपालमा विसं २०७७ साल असार १० मा पहिलो पटक देखापरेको लम्पी स्किन रोग गत वर्ष महामारीका रूपमा फैलिएको थियो । त्यसबाट ठूलो पशुधनको नोक्सान भएसँगै बागमती प्रदेश सरकारले मातहतका सबै जिल्लामा अभियानका रूपमा खोप कार्यक्रम सञ्चालन गर्दै आएको छ ।
