काठमाडौँ, ५ साउनः वन तथा वातावरणमन्त्री ऐनबहादुर शाहीले सरकार लोकतन्त्रलाई सुदृढ र गणतन्त्रलाई संस्थागत गर्नेगरी अगाडि बढ्ने बताउनुभएको छ । आज यहाँ आयोजित कार्यक्रममा उहाँले शीर्षनेताको सुझबुझका साथ वर्तमान गठबन्धन बनेकाले देशका मूलभूत समस्या समाधान गर्दै सरकार अगाडि बढ्ने बताउनुभएको हो । “सरकार फेरबदलबाट जनता हैरान भइसकेका छन्, कांग्रेस–एमाले गठबन्धनको यो सरकार अन्तिम विकल्प हो, त्यसैले राजनीतिक स्थायित्व र विकासका काम गर्न केन्द्रित हुन्छौँ”, मन्त्री शाहीले भन्नुभयो ।
मन्त्री शाहीले वर्तमान सरकारले लोकतन्त्रलाई सुदृढ बनाउने, गणतन्त्रलाई संस्थागत गर्ने र यसमा भएका कमीकमजोरी सुधार गरेर अगाडि बढ्ने बताउनुभयो । उहाँले वर्तमान सरकार विशिष्ट परिस्थितिमा निर्माण भएकाले सुशासन, राजनीतिक स्थायित्व र विकास दिएर देशलाई अग्रगतिमा लैजाने उल्लेख गर्नुभयो । “सरकार अस्थिर हुँदा व्यवस्थाप्रति नै वितृष्णा बढ्दै गएको छ । हाम्रै विशेष पहलबाट आएको लोकतन्त्र, गणतन्त्रलाई सुदृढ, संस्थागत गर्ने र यसमा भएका कमीकमजोरी सुधार गरेर थप काम गर्छौं । जनताको समस्या समाधान गर्ने अहिलेको सरकारको मुख्य उद्देश्य हो”, उहाँले अगाडि भन्नुभयो ।
