महेन्द्रनगर (धनुषा)-जनकपुर-ढल्केबर सडकखण्डको बसही पुल यथाशिघ्र निर्माणको माग राख्दै जनमत पार्टी मिथिला नगरपालिका नगर कार्य समितिले मधेस प्रदेशका मुख्यमन्त्री सतिश कुमार सिंहलाई शुक्रबार ध्यानाकर्षण पत्र बुझाएको छ ।
मिथिला नगरपालिका वडा नम्बर २ र ६ को सिमानामा पर्ने बसही खोलाको सो पुलमा पटक पटक सवारी दुर्घटना हुने गरेको छ । दुर्घटनामा धेरैले ज्यान गुमाइसकेकाले अधुरा पुल यथाशिघ्र निर्माणको माग राख्दै मुख्यमन्त्री सिंहलाई ध्यानाकर्षण-पत्र बुझाएको हो ।
पार्टीका नगर कार्यसमिति अध्यक्ष अभिमन्यू प्रसाद महतो र पूर्वअध्यक्ष सरोजकुमार सिंहसहितको टोलीले मुख्यमन्त्री सिंहलाई बुझाएको पत्रमा बसही खोलामाथिको पुल निर्माण रोकिएको बारे छानबिन गरी यथाशिघ्र निर्माण गरिदिन अनुरोध गरिएको छ ।
छ लेनको जनकपुर-ढल्केबर सडकखण्ड निर्माण सकिए पनि बसही खोलामाथिको पुल निर्माण हुन सकेको छैन । सडक चौडा भए पनि सडकअनुसार नयाँ पुल निर्माण सम्पन्न नहुँदा पुरानो जीर्ण दिनहुँ सवारी दुर्घटना हुने गरेको जनमत पार्टीका पूर्वनगर अध्यक्ष सिंहले बताउनुभयो ।
