विराटनगर, ६ असारः कोशी प्रदेशसभाको आज बसेको बैठकमा आर्थिक वर्ष २०८१/८२ को आर्थिक विधेयकमाथिको छलफल सकिएको छ ।
कोशी प्रदेशसभा नियमावली, २०७४ को नियम १२५(४) बमोजिम आर्थिक मामिला तथा योजना मन्त्री रामबहादुर मगरले सो विधेयक सदनमा पेश गर्नुभएको थियो । मन्त्री मगरले समयको अभावमा आर्थिक विधेयकमा बृहत छलफल गर्न नसकेपनि विधेयक निर्माण गर्दा विभित्र क्षेत्र, सांसद, राजनीतिक दलहरुसँग छलफल गरेर नै ल्याएको जानकारी दिनुभयो ।
छलफलमा उठेको प्रश्नहरुको जवाफ दिँदै मन्त्री मगरले वर्तमान आर्थिक विधेकयले ढुङ्गा सङ्कलन र बिक्री मूल्यलाई व्यवस्थित गरेको बताउँदै करका दायरा र क्षेत्रमा विशेष अध्ययन गरिने कुरामा जोड दिनुभयो ।
उहाँले प्रदेशमा भएका तारे होटेल र क्यासिनोबाट व्यवस्थित ढङ्गले राजस्व उठाउने विधि अपनाउने भन्दै पहाडी र हिमाली क्षेत्रमा पर्यटकको पहुँच पु¥याउन र जलयात्रालाई सरकारले उचित व्यवस्था गर्ने स्पष्ट पार्नुभयो ।
सरकारले कर सङ्कलन गर्ने संयन्त्र र स्थानीय तहबाट प्राप्त हुने राजस्वलाई अझ फराकिलो बनाउने उल्लेख गर्दै मन्त्री मगरले राजस्वको स्रोत नखोज्ने र बाँडफाँटमा मात्र केन्द्रित भइयो भने विकासका योजनाहरु आगाडि बढाउन नसकिने जिकिर गर्नुभयो ।
छलफलमा प्रदेशसभा सदस्यहरु खड्गबहादुर बस्नेत, रमेशकुमार बस्नेत, गोपाल तामाङ्गले आर्थिक विधेयकलाई अपनत्व ग्रहण गर्न बृहत छलफलको आवश्यकता औल्याउनुभएको थियो ।
बैठकको विशेष समयमा सदस्य तिलकुमार मेन्याङ्बो(लिम्बू)ले अबिरल बर्षाका कारण यसप्रदेशमा भएको जनधनको क्षतिप्रति दुःख व्यक्त्त गर्नुभयो । उहाँले अहिले पनि यस प्रदेशको पहाडी क्षेत्रमा बाढी र पहिरोको कारण कतिपय परिवारको घर जोखिममा रहेकाले सुरक्षित बासका लागि सरकारको ध्यानाकर्षण गराउँदै बाढीले खेतबारी बगाएको, विस्थापित भएका परिवार र चौपायाहरु मरेकाले पीडित परिवारलाई आवश्यकत क्षतिपूर्ति गर्न प्रदेश सरकारको ध्यानाकर्षण गराउनुभयो । प्रदेशसभा सदस्य विद्या चाम्लिङ्ग राईले सरकारले ल्याएको आगामी आर्थिक वर्षका लागि बजेटप्रति असन्तुष्टि व्यक्त गर्दै बजेटले नागरिकका समस्या समाधान नहुने तर्क गर्नुभयो ।
साथै बैठकका शून्य समयमा सदस्यहरु किशोरचन्द्र दुलाल, रोहित कार्की, खगेनसिं हाङ्गाम, प्रेमराज थाम्सुङ्हाङ्ग, भीम पराजुली र राधाकृष्ण खनालले पनि प्रदेशको समसामयिक विषयमा बोल्नु भएको थियो ।
