टीकापुर (कैलाली), २२ कात्तिक : कैलालीको टीकापुरस्थित गौशालाले दीपावलीलाई लक्षित गरेर गाईको गोबरबाट निर्माण गरिएका ‘दीपावली र रङ्गोली दियो’ बजारमा ल्याएको छ । सामुदायिक पशुचौपाया व्यवस्थापन तथा प्रवर्द्धन समितिले सञ्चालन गरेको गौशालाले नौ हजार दीपावली दियो र एक हजार पाँच सय रङ्गोली दियो उत्पादन गरेर बिक्री थालेको हो ।
उत्पादन भएका दियो बजारका पसल तथा स्थानीयले माग गरिरहेका समितिका सचिव द्वारिकाप्रसाद जोशीले जानकारी दिनुभयो । “विदेशमा रहेका नेपालीले आ–आफ्नो घरमा पु¥याइदिन माग गरिरहनुभएको छ । हामीले घरमै पु¥याउने गरेका छौँ”, उहाँले भन्नुभयो, “बजारमा पनि यसको माग उच्च छ । आजबाट हामीले बिक्री थालेका छौँ ।”
उत्पादित सामग्रीमा ५० प्रतिशतसम्म नाफा रहेको जोशीले बताउनुभयो । उहाँका अनुसार गौशालामा भगवान्का मूर्ति, धूपबत्ती, शुभलाभ, लक्ष्मीका पाइलासमेत बिक्रीका लागि राखिएका छन् ।
समितिका सदस्यले तालिम लिएर गाईको संरक्षण गर्ने तथा आम्दानी पनि गर्ने उद्देश्यले गोबरबाट यी सामग्री उत्पादन थालेका जोशीले बताउनुभयो । “गौशालाका केही सदस्य गाईको गोबरबाट धूपबत्ती र गोबरका विभिन्न सामग्री निर्माणबारे भारतको काशिपुर गएर तालिम लिएर आएका हुन् । यसका साथै गोबरको मल बिक्रीसमेत गर्ने गरिएको छ”, उहाँले भन्नुभयो ।
गौशालाले योसँगै नम्बरप्लेट, शुभलाभका चित्र, भगवान्का मूर्ति, प्रमाणपत्रलगायत सामग्री निर्माण थालेको छ । साथै गाई संरक्षणका लागि टीकापुरमा श्रीमद्भागवत् महायज्ञ गर्न तयारीसमेत भइरहेको गौशालाका सदस्य उपेन्द्र न्यौपानेले जानकारी दिनुभयो । उहाँका अनुसार मङ्सिरमा महायज्ञ सञ्चालनका लागि विभिन्न क्षेत्रका सरोकारवालासँग छलफल भइरहेको छ ।
“गाई संरक्षणमा हामी जागेका छौँ । गाई पाल्नका लागि स्थानीयस्तरमै आम्दानीका स्रोतको खोजी गरी आम्दानी गर्न सकिन्छ भन्ने सन्देश दिनका लागि काम गरिरहेका छौँ”, न्यौपानेले भन्नुभयो, “यसमा सबैको साथ र सहयोग हुनुपर्छ । गाई संरक्षणका लागि आर्थिक जोहो गर्न महायज्ञ गर्न थालिएको हो ।”
समितिले गाई संरक्षणका लागि गरेका कार्यले सबैलाई सहज हुनाका साथै किसानलाई बढी लाभ भएको स्थानीय बताउँछन् । गाई संरक्षणका साथै विभिन्न सामग्री उत्पादन गरेर युवाले गरिरहेका कार्यमा सबैको साथ आवश्यक रहेको स्थानीय शेरबहादुर विष्टको भनाइ थियो । सामुदायिक पशुचौपाया व्यवस्थापन तथा प्रवर्द्धन समितिले अहिले सात सयभन्दा बढी गाई संरक्षण गरिरहेको छ ।
