झापा, २६ साउन -झापा, कन्काई नगरपालिका-१ सिर्जना टोलस्थित बाघे खोलामा डुबेर २ जनाको बिहीबार दिउँसो मृत्यु भएको छ । मृत्यु हुनेहरूमा सोही ठाउँ बस्ने बिजय भुजेलकी छोरी ४ वर्षीया निशा भुजेल र देबी माया जोगीको छोरा ३ वर्षीय कुमार जोगी रहेका छन् । पौडी खेल्ने क्रममा डुबेर निशाको घटनास्थलमै मृत्यु भएको हो भने अशक्त भएका कुमारको बिर्तासिटी अस्पताल बिर्तामोडमा उपचारको क्रममा मृत्यु भएको हो ।
यसैगरी झापा, कचनकवल गाउँपालिका-१ बस्ने ८० वर्षीय नर बहादुर राई सोही ठाउँस्थित अदुवाखोलाले बगाएर बिहीबार मृत्यु भएको छ । उक्त खोलामा नुहाउन गएका उनी खोलाले बगाई बेपत्ता भएको भन्ने खबर प्राप्त हुनासाथ अस्थायी प्रहरी चौकी कुटी, ईलाका प्रहरी कार्यालय राजगढ र बिओपी घेराबारीबाट खटिएको संयुक्त टोली खोजी गर्ने क्रममा शव फेला पारेको हो ।
रोल्पा, थवाङ गाउँपालिका-१ तर्जुवाङ बस्ने संगिता विकको छोरा २ वर्षीय राज विक सोही गाउँपालिका-१ जुर्वाङ स्थित जुर्वाङखोलाले बगाएर बिहीबार मृत्यु भएको छ । संगिताले आफ्नो छोरा राजलाई बोकी खोला तर्ने क्रममा ढुङगामा खुट्टा चिप्लिँदा साथमा रहेको छोरालाई खोलाले बगाएपश्चात खोजी गर्ने क्रममा उनको शव फेला परेको हो ।
सिरहा, कल्याणपुर नगरपालिका-३ कमला नदीस्थित प्रसाही घाटमा धनुषा गणेशमान चारनाथ नगरपालिका-७ पोर्ताहा बस्ने ४० वर्षीय साजन परियार बिहीबार मृत फेला परेका छन् । धनुषा गणेशमान चारनाथ नगरपालिका-७ पोर्ताहास्थित कमला नदीले बगाएर ल्याएको दाउरा निकाल्ने क्रममा मंगलबार बगाई बेपत्ता भएका उनको शव फेला परेको हो ।
यस सम्बन्धमा प्रहरीले थप अनुसन्धान गरिरहेको छ ।
