गुजरात टाईटन्स भारतमा जारी ईन्डियन प्रिमियर लिग आईपीएलमा जित निकाल्दै शीर्षस्थानमा उक्लिएको छ । मुम्बई ईन्डियन्सलाई ५५ रनको फराकिलो अन्तरमा हराउदै गुजरात शीर्ष स्थानमा उक्लिएको हो । गुजरातले दिएको २ सय ८ रनको लक्ष्य पछ्याएको मुम्बईले निर्धारित २० ओभरमा ९ विकेट गुमाएर १ सय ५२ रन मात्र बनायो ।
मुम्बईका लागि निहाल वाधिराले २१ बलमा ३ चौका र ३ छक्काको सहयोगमा ४० रन बनाए । क्यामरुन ग्रीनले २६ बलमा ३ छक्काको सहयोगमा ३३ रन बनाए । गुजरातका लागि नूर अहमदले ३ तथा मोहित शर्मा र राशिद खानले समान २-२ विकेट लिए । कप्तान हार्दिक पान्ड्याको नाममा १ विकेट रह्यो । त्यसअघि टस हारेर पहिले ब्याटिङ गरेको गुजरातले निर्धारित २० ओभरमा ६ विकेट गुमाएर २ सय ७ रन बनाएको थियो ।
गुजरातका लागि ओपनर शुभमन गिलले ३४ बलमा ७ चौका र १ छक्काको सहयोगमा ५६ रनको अर्धशतकीय ईनिङ खेले । डेबिड मिलरले २२ बलमा २ चौका र ४ छक्काको सहयोगमा ४६ रन बनाए । अनुभब मनोहरले २१ बलमा ३ चौका र ३ छक्काको सहयोगमा ४२ रन बनाए । पाँचौ विकेटका लागि मनोहर र मिलरले ३५ बलमा ७१ रनको साझेदारी गरे ।
विजय शंकरले १६ बलमा १९ तथा कप्तान हार्दिक पान्ड्याले १४ बलमा १३ रन बनाए । अन्तिम पाँच ओभरमा गुजरातले २ विकेट गुमाएर ७७ रन बनाएको थियो । मुम्बईका लागि पियुष चावलाले २ तथा राईली मेरिडेथ,अर्जुन तेन्दुल्कर र कुमार कार्तिक्येले समान १र१ विकेट लिए ।
