तेश्रो सन्दकपुर गोल्डकपको उपाधि फिक्कल युनाइटेडले जित्न सफल भएको छ । सन्दकपुर गाउँपालिका सातखाल्डे खेलमैदानमा जारी प्रतियोगिताको फाइनल खेलमा बुट्टाबारी युनाइटेडलाई ३-२ गोल अन्तरले हराउँदै फिक्कलले उपाधि जित्न सफल भएको हो । खेलमा फिक्कलका लागि १२ औं मिनेटमा नयन प्रधानले गोल गरेका थिए । २३ औं मिनेटमा शौरभ कार्कीले हेडर मार्फत अग्रता दोब्बर बनाए ।
खेलको ५२ औं मिनेटमा बुट्टाबारीका लागि कप्तान रोमन खवासले पेनाल्टी मार्फत गोल गरे । ५८ औं मिनेटमा शेखर राईले खेल ३-१ बनाएका थिए तर त्यसको ८ मिनेट पनि नबित्दै बुट्टाबारीका लागि रोमनले पेनाल्टी मार्फत गोल थपे पनि उपाधि भने फिक्कलको पोल्टामा गयो । बिजेता बनेको फिक्कलले १ लाख ५१ हजार र उपविजेता बुट्टाबारीले ८१ हजार प्राप्त गरेको छ ।
