स्पेनिस ला लिगा फुटबलमा रियल मड्रिडले शानदार जित हात पारेको छ । आइतबार राति भएको खेलमा रियलले रियल भालाडोलिटलाई ६-० गोलको भारी अन्तरले पराजित गर्दै शानदार जित निकालेको हो । रियलको फराकिलो जितमा करिम बेन्जिमाले ह्याट्रिक पुरा गरे । यस्तै रोड्रिगो, मार्को एसेन्सियो र लुकास भाज्क्वेजले एक एक गोल गरे ।
खेलको २२ औं मिनेटमा रोड्रिगोले गोल गर्दै रियललाई सुरुआती अग्रता दिलाएका थिए ।२९ औं मिनेटमा बेन्जिमाले रियलको अग्रता दोब्बर बनाए ।खेलको ३२ औं मिनेटमा बेन्जिमाले व्यक्तिगत दोस्रो गोल गर्दा रियलको अग्रता तेब्बर बन्यो ।३६ औं मिनेटमा बेन्जिमाले ह्याट्रिक पूरा गरेपछि रियलको अग्रता ४-० को बन्यो ।
खेलको ७३ औं मिनेटमा एसेन्सियोले गोल गर्दा रियल ५-० ले अघि रह्यो ।त्यसपछि खेलको इन्जुरी समयमा लुकासले गोल गर्दै रियललाई ६-० को जित दिलाए ।जितसँगै रियलले २७ खेलमा ५९ अंक जोडेको छ । रियल दोस्रो स्थानमा रहेको छ ।
