काठमाडौं -भारतका चर्चित पूर्व क्रिकेटर सलिम दुरानीको निधन भएको छ । दुरानीको ८८ वर्षको उमेरमा निधन भएको हो । दुरानी भारतको गुजरातस्थित आफ्नो भाइको घरमा बस्दै आएका थिए । गत जनवरीमा उनको तीघ्राको हड्डीको अपरेसन गरिएको थियो ।
आफ्नो पालामा अलराउन्डर क्रिकेटरको पहिचान बनाएका उनले आक्रामक बायाँ हाते बलर र ब्याटर हुन् । दुरानीले २९ टेस्ट खेल्दा १ हजार २०२ रन बटुलेको र ७५ विकेट लिएको ईएसपीएनले जनाएको छ ।
सन् १९७१ मा वेस्ट इन्डिजमा भारतलाई पहिलो टेस्ट क्रिकेट जिताउन मद्दत गरेका कारण उनलाई सबैभन्दा धेरै सम्झना गरिन्छ । पोर्ट अफ स्पेनमा भएको दोस्रो इनिङमा भारत ७ विकेटले विजयी भएको थियो । सो खेलमा दुरानीले १७ ओभरमा जम्मा २१ रन खर्चिएका थिए ।
