नवलपुर – जङ्गलबाट बस्तीमा छिरेको चितुवाको आक्रमणबाट जिल्लाको मध्यविन्दुका एक जना किसानको भेडा गोठ नै रित्तिएको छ । मध्यविन्दु–१ अभियनकी कृषक मनकुमारी महतोले गोठभित्र थुनेको १५ भेडामध्ये ११ वटा भेडा चितुवाको आक्रमणबाट मरेको प्रहरीले जनाएको छ ।जिल्ला प्रहरी कार्यालय नवलपरासी (बर्दघाट–सुस्तापूर्व)का प्रवक्ता प्रहरी नायब उपरीक्षक दिलीपकुमार गिरीले चितुवाको आ क्रमणबाट गोठमा रहेका अन्य चारवटा भेडा गम्भीर घाइते भएका बताउनुभयो ।
चितुवाको आक्रमणबाट भेडा गोठ नै रित्तो भएपछि महतो पीडामा छिन् । स्थानीय गणेश महतोले चितुवाको आक्रमणबाट रु दुई लाखभन्दा बढीको क्षति भएको बताउनुभयो । कच्ची गोठ भएकाले सजिलैसँग चितुवा गोठभित्र छिरेर भेडालाई आक्रमण गरेको हुनसक्ने प्रहरीले जनाएको छ ।(रासस)
