पहिलो अन्तराष्ट्रिय मैत्रीपूर्ण खेलमा नेपाली राष्ट्रिय महिला फुटबल टोली घरेलु टोली भारतलाई बराबरीमा रोकेको छ । चेन्नईमा आज राति सम्पन्न खेलमा सावित्रा भण्डारी एक्लैले दुई गोल गरेपछि नेपालले भारतसँग २-२ गोलको बराबरी खेलेको हो । जवाहरलाल नेहरू स्टेडियममा भएको खेलमा दुई गोलको अग्रता उल्टाएर नेपालले घरेलु टोली भारतलाई बराबरीमा रोकेको हो ।
खेलको चारै गोल दोस्रो हाफमा भएको थियो । खेलको ५६ औं मिनेटमा सौम्या गुगुलोथले गोल गर्दै भारतलाई सुरुआती अग्रता दिलाएकी थिइन् । खेलको ६८ औं मिनेटमा इन्दुमथी काथिरेसनले गोल गर्दै भारतको अग्रता २-० को बनाईन् । तर, ९० औं मिनेटमा सावित्रा भण्डारीले पेनाल्टीबाट गोल गर्दै नेपाललाई २-१ को स्थितिमा ल्याईन् ।
भारतकी स्विटी देवीले पेनाल्टी बक्समा ह्यान्डबल गरेपछि नेपालले पेनाल्टीको अवसर पाएको थियो। जसमा सावित्राले सहजै गोल गरिन् । त्यसपछि खेलको इन्जुरी समयमा सावित्राले व्यक्तिगत दोस्रो गोल गर्दै २-२ गोलको बराबरीमा ल्याउदै नेपाललाई हारबाट जोगाईन् । नेपाल र भारतबीचको दोस्रो मैत्रीपूर्ण खेल शनिबार हुनेछ ।
