मुम्बई । बलिउड निर्माता तथा निर्देशक करण जोहर लभस्टोरी चलचित्र बनाउन निकै परिचित छन् । उनले पाँच वर्षअघि ‘ए दिल हे मुश्किल’ निर्देशन गरेपछि नयाँ चलचित्र निर्देशनमा हात हालेका थिएनन् । यसैबीच करणले पाँच वर्षपछि नयाँ चलचित्र निर्देशन गर्ने तयारीमा छन् । उनले निर्देशन गर्न लागेको चलचित्र ‘रक्की और रानी कि प्रेम कहानी’ हो ।
चलचित्रमा बलिउड अभिनेता रणवीर सिंह र अभिनेत्री आलिया भट्टको प्रमुख भूमिका रहने जनाइएको छ । करणले चलचित्र घोषणा गर्दै केही समयपछि आफ्नै प्रिय ठाउँमा फर्किएको बताए । सौर्य दैनिकमा खबर छ । उनले भने, ‘केही वर्षपछि म फेरि आफ्नै यात्रामा फर्किएको छु । मेरो प्रिय ठाउँ, जहाँ प्रेमका कुरा हुनेछन् । यो एक विशेष प्रेम कथा हो । जसमा पारिवारिक र प्रेमको कुरा भनिनेछ ।’
यसअघि ‘गुल्ली ब्वाई’ मा काम गरेपछि रणवीर र आलियालाई दर्शकले मनपराएका थिए । करणले निर्देशन गरेका ‘कुछ कुछ होता हे, कभी खुशी कभी गम, ए दिल हे मुश्किल’ लगायतका पारिवारिक लभस्टोरी चलचित्रले बक्स अफिसमा निकै चलेका थिए ।
