कतारमा जारी फिफा विश्वकप फुटबलको पहिलो सेमिफाइनल खेल आज हुँदैछ । दोहाको लुसेल रंगशालामा पौने १ बजे हुने पहिलो सेमिफाइनल खेलमा साबिक उपबिजेता क्रोएसिया र अर्जेन्टिना फाइनल प्रबेशका लागि भिड्ने छन् । दुबै टोली अर्जेन्टिना र क्रोएसिया फाइनल पुग्ने योजनामा हुनेछ ।
अर्जेन्टिना लियोनल मेस्सीको कप्तानीमा मैदान उत्रदैछ भने क्रोएसियाको कप्तानी लुका मोड्रिचले गर्नेछन् । दुबैका लागि विश्वकप उपाधि जित्न यो अन्तिम मौका समेत रहेको छ । अर्जेन्टिना क्रोएसियालाई हराएर छैटौं पटक विश्वकपको फाइनल पुग्ने योजनामा रहेको छ । अर्जेन्टिनाले दुई पटक विश्वकप जितिसकेको छ ।
अर्जेन्टिनाले क्वाटरफाइनलमा नेदरल्यान्ड्सलाई पेनाल्टी सुटआउटमा हराएको थियो । क्रोएसिया पनि दोस्रो पटक विश्वकपको फाइनल पुग्न चाहन्छ । क्रोएसियाले विश्वकप उपाधि जित्न सकेको छैन । क्रोएसियाले क्वाटरफाइनलमा ब्राजिललाई पेनाल्टी सुटआउटमै हराएको थियो । अर्जेन्टिना र क्रोएसियाबीच हालसम्म पाँच खेलमा प्रतिस्पर्धा भएको छ ।
जसमा अर्जेन्टिना र क्रोएसिया समान दुई खेलमा जित निकालेको छ । एक खेल बराबरीमा टुंगिएको छ । अर्जेन्टिना र क्रोएसियाबीच पछिल्लो पटक २०१८ को विश्वकपमा प्रतिस्पर्धा भएको थियो । समूह चरणको भेटमा क्रोएसियाले अर्जेन्टिनालाई ३(० ले हराएको थियो ।
