काठमाडौं । नायिका साम्राज्ञी राज्यलक्ष्मी शाहको अभिनय रहेको फिल्म ‘तिम्रो मेरो साथ’पुष २९ गतेबाट प्रदर्शनमा आउने तयारीमा रहेको छ । जसमा उनी बोल्ड अवतारमा नै प्रस्तुत भएकी छन् ।
फिल्म ‘तिम्रो मेरो साथ’को टिजर र बिहीवार रिलिज भएको नयाँ गीत हेर्दा त्यो बुझ्न सकिन्छ । ‘तिम्रो मेरो साथ’मा साम्राज्ञीको अभिनेता पुष्प खड्कासँग जोडी बाँधिएको छ । पहिला यो फिल्ममा अभिनेता पल शाह अनुबन्धित भएका थिए ।
तर, उनले पछि हात झिकेपछि उनको ठाउँमा पुष्प भित्रिएका हुन् । पुष्प र साम्राज्ञीले यसअघि ‘मारुनी’ र ‘मंगलम’ मा एकसाथ काम गरेका थिए । संयोगबस्, यो जोडीलाई तेस्रो पटक पनि एकसाथ काम गरेका छन् ।
साम्राज्ञीले आफ्नो करिअरमा दोहोर्याएर काम गरेका अभिनेता पुष्प मात्रै हुन् । हालै सोही फिल्मको ‘जोश छ जवानीको’बोलको गीत रिलिज गरियो । कार्यक्रममा वक्ताहरुले उनको खुलेर तारिफ गरेका थिए ।
