कतारमा जारी फिफा विश्वकप फुटबलमा आज बाट क्वाटरफाइनलका खेलहरु सुरु हुँदैछ । आज दुई वटा क्वाटरफाइनल खेलहरु हुनेछन् ।पहिलो क्वाटरफाइनलमा ब्राजिल र क्रोएसियाबीच एजुकेसन सिटी स्टेडियममा राति पौने ९ प्रतिस्पर्धा हुनेछ । आज दुबै टोली जित निकाल्दै सेमिफाइनल पुग्ने दाउमा रहेका छन् ।
क्रोएशिया साबिक उपबिजेता समेत रहेको र बलियो टिम रहेकोले ब्राजिललाई सहजै जित निकाल्न गाह्रो छ । उता क्रोएशिया फुटबलको महारथी मानिएको ब्राजिल संग भिड्दैछ । तसर्थ ब्राजिललाई हराउनु पनि क्रोएशियाको लागि फलामको चिउरा चपाए सरह हुनेछ ।
ब्राजिलले राउण्ड अफ १६ मा दक्षिण कोरियालाई हराएको थियो ।साविक उपविजेता क्रोएसियाले जापानलाई हराएको थियो । यस्तै दोस्रो क्वाटरफाइनलमा अर्जेन्टिना र नेदरल्यान्ड्सबीच प्रतिस्पर्धा हुनेछ । लुसाइल स्टेडियममा हुने अर्जेन्टिना र नेदरल्यान्ड्सबीचको खेल राति पौने १ बजे सुरु हुनेछ ।
अर्जेन्टिना र नेदरल्यान्ड्स पनि जित निकाल्दै अन्तिम चारमा पुग्ने योजनाका रहेका छन् । अर्जेन्टिनाले राउण्ड अफ १६ मा अष्ट्रेलियालाई हराएको थियो । यस्तै नेदरल्यान्ड्सले अमेरिकालाई हराएको थियो ।
