काठमाडौं २८ भदौ । राष्ट्रिय प्रजातन्त्र पार्टी राप्रपाका अध्यक्ष राजेन्द्र लिङदेनले शिर्ष दलका नेताहरु नसुध्रिएसम्म मुलुक समृद्ध नबन्ने बताएका छन् ।
मंगलबार कुश्माबजारमा आयोजित कार्यकर्ता भेलालाई सम्बोधन गर्दै अध्यक्ष लिङ्देनले राजनीतिक दलका गलत क्रियाकलापहरुले नै मुलुक समस्यामा पर्दै भएको भन्दै यस्तो प्रतिक्रिया दिएका हुन् ।
भ्रष्टाचार र अनियमितता मौलाउँदै गएको भन्दै गुनासो पोखेका अध्यक्ष लिङदेनले कांग्रेस, एमाले, माओवादीले तीस वर्षभन्दा बढि शासन गरेपनि नयाँ शब्द बाहेक काममा नयाँपन ल्याउन नसकेको बताए ।
ठूला दलहरुसँग न मुलुक बनाउने स्पष्ट खाका छ, न रोजगारी सिर्जना, कलकारखाना संचालन, बढ्दो युवा पलायनदर घटाउने कुनै योजना नभएको आरोप लगाएका उनले भने,‘जबसम्म निर्वाचनमार्फत् ठूला दलहरु पराजित हुँदैनन् तबसम्म यहि अवस्थाले निरन्तरता पाइरहन्छ ।’
ठूला दलहरुको पार्टी कार्यालय र कार्य समिति मात्र फरक रहेको तर भ्रष्टाचार गर्ने र देशलाई लुट्ने बेला एउटै दलजस्तै हुने गरेको छ । जति शासन गरेपनि एक हजार जना युवायुवतीले रोजगारी पाउने ठाउँ खोल्न नसकेको बताएका उनले दैनिक हजारौंको संख्यामा युवायुवती विदेसिन बाध्य भएको बताए ।
उनले भने ‘मुलुक विदेशीहरुको चंगुलमा फसाउने र लम्पसार पर्ने बाहेक केहि हुन सकेको छैन ।’
