काठमाडौँ ७ असार । कोरोना विरुद्धको पहिलो खोप लगाएका ६५ वर्षमाथिका ज्येष्ठ नागरिकलाई दोस्रो डोजको खोप तत्काल लगाउन माग गर्दै सर्वोच्चमा रिट दायर भएको छ ।
भारतीय कम्पनी सेरम इन्ष्टिच्युटले उत्पादन गरेको कोभिशिल्ड खोप लगाएका ज्येष्ठ नागरिकलाई दोस्रो डोजको खोप यथाशीघ्र लगाउन माग गर्दै ज्येष्ठ नागरिक चिरञ्जीवि बास गिरीले आज सोमबार रिट दर्ता गराएका हुन् ।
पहिलो डोज लगाएको १२ हप्ताभित्र दोस्रो डोज खोप दिनुपर्ने भए पनि पहिलो डोज खोप लगाएका साढे १३ लाख ज्येष्ठ नागरिकले दोस्रो डोज खोप पाएका छैनन् । यस रिटको पेशी भोली मंगलबारलाई तोकिएको छ ।
