सुर्खेत ८ साउन । नेकपा एमालेका महासचिव शंकर पोखरेलले सत्ता र गठबन्धन टिकाउनका लागि नागरिकता विधेयक संसदबाट पारित गरिनु सरकारको नालायकीपन भएको बताएका छन् ।
आइबार सुर्खेतको वीरेन्द्रनगरमा आयोजित पत्रकार सम्मेलनमा सम्बोधन गर्दै महासचिव पोखरेलले यस्तो बताएकाहुन् । ‘यो सरकारको नलायकीपन हो । सत्ता र गठबन्धन टिकाउने गरिएको सम्झौता हो ।’ उनले भने ।
माओवादी केन्द्रका अध्यक्ष प्रचण्ड भारत भ्रमण सकेर आए लगत्तै नागरिकता विधेयक पारित गरिएको भन्दै महासचिव पोखरेलले शंका पैदा भएको बताए ।
‘पहिले माओवादी कै कारण रोकिएको विधेयक अहिले प्रचण्ड भारतबाट फर्किए लगतै माओवादीकै अग्रसरतामा नागरिकता विधेयक पारित हुनुले शंका पैदा भयो’ उनले भने ।
नागरिकता विधेयक पारित गरेपछि असन्तुलन पैदा भएको बताएका उनले नेपाली चेलीहरुले जुन अधिकार भारतबाट प्राप्त गरेका छन्, त्योभन्दा बढी सुविधा दिने कुरा उचित नभएको बताए ।
एमालेले नागरिकता विधेयकको विरोध गर्दै साउन १६ गते प्रदर्शन गर्ने तयारी समेत गरेको उनले जानकारी गराएका छन् । गठबन्धन र प्रधानमन्त्रीका लागि सत्तारुढ दलका नेताहरु विदेश धाउनु लज्जाको विषय भएको बताए ।
