काठमाडौं १३ असार । नेकपा माओवादी केन्द्रका अध्यक्ष पुष्पकमल दाहाल प्रचण्डले कम्युनिस्टलाई सडेका अण्डाको संज्ञा दिएका छन् ।
सोमबार नरबहादुर कर्माचार्य स्मृति प्रतिष्ठानको कार्यक्रममा बोल्दै प्रचण्डले कम्युनिस्टहरू बिग्रिए संसारकै सबैभन्दा काम नलाग्नेमा परिणत हुने भन्दै सडेको अण्डाको संज्ञा दिएका हुन् ।
‘कम्युनिस्टहरू राम्रा हुन्छन् । वैज्ञानिक हुन्छन् । धैर्यतापूर्वक विश्लेषण गर्छन् । तर बिग्रेपछि कम्युनिष्टजति खराब कोही पनि हुँदैन । अण्डा लाभदायी हुन्छ तर सड्यो भने त्यो जति गन्धा केही पनि हुँदैन । अण्डा जति गन्धा केही हुँदैन । कम्युनिस्ट बिग्रिए त्यस्तै हुन्छन्’ उनले भने ।
कम्युनिस्टहरू राम्रा हुन्छन् भनेर एकता गरेको बताएका उनले आफ्ना सहयोद्धालाई देखि नसहने देखिएको बताएका छन् ।
कम्युनिस्टहरूसँग संविधान र समाजवादलाई सफल बनाउन वाम गठबन्धन र पार्टी एकता गरे पनि यी सबै प्रयास केपी शर्मा ओलीका कारण बरबाद भएको आरोप लगाएका प्रचण्डले ओलीको पालामा भ्रष्टचारले पराकाष्ट नाघेको समेत दावी गरेका छन् ।
