पहिलो एकदिवसीय अन्तराष्ट्रियमा इंग्ल्यान्डले नेदरल्यान्ड्समाथि फराकिलो जित निकालेको छ । शुक्रबार भएको खेलमा इंग्ल्यान्डले नेदरल्यान्ड्सलाई २ सय ३२ रनको फराकिलो जित निकालेको हो । जितसँगै तीन खेलको सिरिजमा इंग्ल्यान्डले १-० को अग्रता बनाएको छ । इंग्ल्यान्डले दिएको ४ सय ९९ रनको कीर्तिमानी लक्ष्य पछ्याएको नेदरल्यान्ड्सले ४९ ओभर ४ बलमा अलआउट हुँदै २ सय ६६ रन बनायो ।
नेदरल्यान्ड्सका लागि स्कट एड्वार्ड्सले अविजित ७२ रनको अर्धशतकीय इनिङ खेले ।म्याक्स ओडेडले ५५ रनको अर्धशतकीय इनिङ खेल्दा बास डी लिडेले २८ र कप्तान पिटर सिलारले २५ रन जोडे । इंग्ल्यान्डका मोइन अलीले ३ तथा डाभिड विलि, रिस टोप्ले र साम करणले २-२ विकेट लिए । त्यसअघि पहिले ब्याटिङ गरेको इंग्ल्यान्डले ५० ओभरमा ४ विकेट गुमाएर ४ सय ९८ रनको कीर्तिमानी योगफल बनाएको थियो ।
इंग्ल्यान्डले आफ्नै नामको कीर्तिमान भङ्ग गरेको हो ।इंग्ल्यान्डका लागि तीन खेलाडीले शतक बनाए ।जोस बट्लरले अविजित रहदै १ सय ६२ रनको शतकीय इनिङ खेले ।यस्तै डाविड मालनले १ सय २५ तथा फिल साल्टले १ सय २२ रनको शतकीय इनिङ खेले ।
