काठमाडौं ३ असार । नेपाली सेनाका प्रधानसेनापति प्रभुराम शर्माले नेपाल कुनै पनि सैन्य गठबन्धनमा सहभागी नहुने बताएका छन् ।
शुक्रबार बसेको अन्तर्राष्ट्रिय सम्बन्ध समितिको बैठकमा अमेरिकाको स्टेट पार्टनरसिप प्रोग्राम (एसपीपी)को विषयमा जवाफ दिने क्रममा प्रधानसेनापति शर्माले अमेरिकी अधिकारीहरुलाई समेत सैन्य गठबन्धन हुँदैन भनेर स्पष्ट पारिसकेको बताएका हुन् ।
शर्माले अमेरिकालाई नेपाल सरकार र रक्षा मन्त्रालयको स्वीकृतीमा एसपीपी सम्बन्धी पठाइएको पत्र सत्य भएको भएपनि सैन्य गठबन्धनका लागि नलेखिएको बताएका छन् । भूकम्पको बेला मानवीय सहायताका लागि भनेर पत्र लेखिएको भन्दै उनले भने,‘अहिले नेपाली सेनाले लेखेको जुन पत्र आएको छ, यो सत्य हो । चिठी लेखिएको साँचो हो । तर चिठी लेख्दैमा सैन्य अलाएन्स लेखिएको छैन ।’
सैन्य गठबन्धन हुने भन्ने कुराको विरोध गरेका उनले यस विषयमा आशंका नगर्न पनि आग्रह गरेका छन् ।
