काठमाडौ २४ । जेठ । नेकपा एमालेका वरिष्ठ उपाध्यक्ष ईश्वर पोखरेलले स्थायी कमिटी सदस्य घनश्याम भुसालमाथि कारवाही गर्न भन्दै अनुशासन आयोगले सिफारिस गरेको विषय पार्टी कमिटीमा छलफल गरिने बताएका छन् ।
मंगलबार संसद् भवनमा सञ्चारकर्मीलाई संक्षिप्त प्रतिक्रिया दिँदै नेता पोखरेलले कमिटीमा छलफल गरेर मात्र निणर्य गरिने बताएका छन् ।
उनले भने, ‘कुनै पनि चिज कमिटीमा छलफल हुन्छ । यदि, कुनै विषय हो भने कमिटीमा आउँछ, छलफल हुन्छ । कमिटीले निर्णय गर्छ । न्युजहरू हेर्छु, पढ्छु । मलाई नि अचम्म लाग्या छ । केही इस्यु कुनै व्यक्ति विशेषको, कुनै निर्णय विशेषको विषय छ भने कमिटीको आन्तरिक एजेन्डा हो यो ,बाहिर पब्लिक कन्जम्सनको विषय होइन । त्यो विषयमा कमिटमा छलफल गरौँला नि हामी ।”
पार्टी अध्यक्ष केपी शर्मा ओलीको आलोचना गरेको भन्दै भुसालमाथि एमालेको केन्द्रीय अनुशासन आयोगले कारबाहीको सिफारिस गरेको छ ।
