ललितपुर २० जेठ । नेकपा (माओवादी केन्द्र) का अध्यक्ष पुष्पकमल दाहाल प्रचण्डले जनतामा माओवादी नै सेवक हो, सुख दुःखमा साथ दिन्छ भन्ने मान्यता स्थापित हुने गरी काम गर्न पालिकाका प्रमुख तथा उपप्रमुखलाई निर्देशन दिएका छन् ।
निवास खुमलटारमा आयोजित एक कार्यक्रममा अध्यक्ष प्रचण्डले जनताको मन जितेर काम गरेको खण्डमा पार्टीलाई एक नम्बरको बनाउन कुनै समस्या नहुने बताएका छन् ।
पार्टीको विचार, सिद्धान्त र आचरण विपरीत कुनै पनि गतिविधि नगर्न आग्रह गरेका प्रचण्डले इमान्दार भएर काम गर्न स्पष्ट शब्दमा निर्देशन दिएका हुन् ।
पालिकाका नवनिर्वाचित प्रमुखरउपप्रमुखको अभिमुखीकरण कार्यक्रममा सहभागी हुन काठमाण्डौ आएका सबै जनप्रतिनिधिलाई पनि प्रचण्डले स्थानीय आवश्यकता र जनताको चाहनालाई ख्याल गरेर काम गर्न आग्रह गरेका थिए ।
