झापाको गौरीगन्जमा गाउँपालिका अब महिलाको नेतृत्वमा गएको छ । गाउँपालिकाको अध्यक्ष र उपाध्यक्ष दुवै पदमा महिला निर्वाचित भए संगै गाउँपालिकाको सिंगो नेतृत्व महिलाको काँधमा गएको हो । गाउँपालिका अध्यक्षमा कांग्रेसकी फूलवती राजवंशी र उपाध्यक्षमा एमालेकी पूजन न्यौपाने कुँवर निर्वाचित भएकि छिन् । फूलवतीले ५ हजार ६८९ मत प्राप्त गरिन् ।
उनका निकटतम प्रतिद्वन्द्वी एमालेका विजयकुमार अग्रवालले ३ हजार ३३० मत पाए । उपाध्यक्ष एमालेकी पूजन न्यौपाने कुँवरले ४ हजार ७५५ मत पाइन् । उनका निकटतम प्रतिद्वन्द्वी कांग्रेसका मखना महतोले ३ हजार ७९५ मत पाए । फूलवती ०७४ को स्थानीय तह निर्वाचनमा राप्रपाका बाबुराजा श्रेष्ठसँग पराजित भएकी थिइन् ।
