यो बर्ष धेरै सेलिब्रेटीहरुको बिबाह हुन जुरेको रहेछ । बिबाह त भयो तर हल्लै नभई सुटुक्क । यसरी बिबाह हुनेहरुमा अभिनेत्री केकी अधिकारी, बर्षा शिवाकोटी रहेका छन् । अब उनीहरुकै लिस्टमा थपिएका छन् युवा पुस्तामाझमा चर्चित गायक स्वप्न सुमन । उनले पनि चर्चा बिनै सुटुक्क विवाह गरेका छन्। उनले अभिनेत्री ज्योत्सना योगीसँग विवाह गरेका हुन्। गत बुधबार भएको उनीहरुको वैवाहिक कार्यक्रममा परिवारभित्रका सदस्यहरुलाई आमन्त्रण गरिएको थियो ।
कमलपोखरीस्थित एक होटलमा भएको बैबाहिक कार्यक्रममा उनीहरुको परिवारका सदस्यहरुको मात्र उपस्थिती रहेको थियो। अभिनेत्री योगीले सामाजिक सञ्जालमार्फत आफूहरु विवाह बन्धनमा बाँधिएको जानकारी दिएपछि मात्र सबैजना जिल्ल परेका छन् । युट्युबबाट आफ्नो गायन यात्रा सुरु गरेका गायक सुमन युवा पुस्ताको ढुकढुकी रहेका छन् । उनका थुप्रै गीतहरु युवापुस्ता माझमा एकदमै चर्चित रहेका छन् ।
उनको कसरी भनुँ तिमीलाई’ देखि ‘हराउन देउ’सम्मका चर्चित गीतहरु रहेका छन् । त्यस्तै अभिनेत्री योगी पनि बिभिन्न म्युजिक भिडियो, फिल्म तथा बिज्ञापनमा छाउने गरेकी छिन् । योगी २०७३ मा प्रदर्शनमा आएको फिल्म ‘म त तिम्रै हुँ’मा मुख्य अभिनेत्रीको रुपमा देखिएकी थिइन्। यसरी यो दुई जोडी बिबाह बन्धनमा बाँधिएको पनि कमैले थाहा पाएका छन् । उनीहरुले छोटो मिठो तरिकाले बिबाह गरेका हुन् ।
