काठमाडौं १९ वैशाख । नेकपा एमालेका नेता घनश्याम भुसालले स्थानीय तह निर्वाचनमा एमालेले पाण्डव भुमिका खेल्ने बताएका छन् ।
सोमबार रुपन्देहीको तिलोत्तमा नगरपालिका–१३ मा आयोजित मतदाता भेटघाट कार्यक्रमलाई सम्बोधन गर्दै नेता भुसालले एमालेको लागि निर्वाचन महाभारत भएको भन्दै एमाले पाण्डवको भूमिकामा निभाउने बताएका हुन् ।
‘महाभारत युद्धमा कौरव र पाण्डवहरूबीचको लडाईं जस्तै अहिलेको स्थानीय निर्वाचनमा एमाले पाण्डवको भूमिकामा छ,महाभारतको लडाईं पाण्डवले जितेजस्तै स्थानीय निर्वाचन एमालेले जित्छ ।’ उनले भने ।
निर्वाचनमा एमालेले विजय हासिल गरेरै छाड्ने बताएका उनले महाभारतमा सत्य र न्यायका लागि लडाईं भएजस्तै यसपालिको निर्वाचन पनि एमालेका लागि सत्य र न्यायका लागि भएको बताएका छन् ।
आफ्नो पार्टीले तिलोत्तमामा अघि सारेको उम्मेदवारहरुको तुलना अन्य पार्टीका उम्मेदवार सँग गर्न नहुने बताएका उनले थप विकासका कार्यक्रमहरू अघि बढ्न एमालेको नेतृत्व आवश्यक भएको जिकिर समेत गरेका छन् ।
