काठमाडौँ । लोकप्रिय गायक प्रकाश सपुतले अमेरिकाको क्यालिफोर्निया राज्यको लस एन्जल्समा आफ्नो प्रस्तुती दिने भएका छन् ।
नेपाली नयाँ बर्षको अवसर पारेर गैर आवासीय नेपाली संघ, राष्ट्रिय समन्वय परिषद् अमेरिका क्यालिफोर्निया राज्य च्याप्टरले कल्याणकारी कोष स्थापनार्थ आयोजना गरेको सांगितिक साँझमा सपुतले प्रस्तुती दिन लागेका हुन् ।
आयोजकका अनुसार प्रकाशले मे ८, २०२२ मा आफ्नो प्रस्तुती दिने छन् । उक्त कार्यक्रममा प्रकाशका अलावा गायिका संगिता थापा मगरको पनि प्रस्तुती रहने आयोजकले जनाएको छ । उक्त कार्यक्रमको संचालन मिस इन्टरकन्टिनेन्टल नेपाल २०२० तथा मिस ग्रान्ड नेपाल २०१९ बिजेता निशा पाठकले गर्नेछिन् ।
कल्याणकारी कोष स्थापना गरी आपतमा परेका नेपालीलाई सहयोग पुर्याउने उद्देश्य राखी कार्यक्रमको आयोजना गरिएको हालसम्म ५ हजार डलर भन्दा बढि सहयोग संकलन भैसकेको च्याप्टर अध्यक्ष एकदेव शर्मा बताउँछन् ।
उक्त कार्यक्रमको टिकटदर ५० डलर राखिएको कार्यक्रम संयोजक च्याप्टरका बोर्ड अफ डाईरेक्टर जोसेफ घलेले ओएस नेपाललाई जानकारी दिए ।
