लहान, १२ वैशाख- आसन्न स्थानीय तह निर्वाचनका लागि जनकपुरधाम उपमहानगरपालिकाको नगरप्रमुख पदमा विभिन्न दल र स्वतन्त्र गरी २१ जनाले उम्मेदवारी दर्ता गराउनुभएको छ । उपप्रमुखमा १० जनाले उम्मेदवारी दर्ता गराउनुभएको छ । दोस्रो दिन आज १९ जनाले नगरप्रमुख पदमा उम्मेदवारी दिनुभएको हो । आइतबार पहिलो दिन दुई जनाले उम्मेदवारी दर्ता गराउनुभएको थियो । उपप्रमुखमा १० जनाले उम्मेदवारी दर्ता गराउनुभएको मुख्य निर्वाचन अधिकृत ब्रजेश प्याकुरेलले जानकारी दिनुभयो ।
जनकपुरधाम उपमहानगरपालिकाको नगरप्रमुख पदका लागि पार्टीले टिकट नदिँदा कांग्रेस, एमालेलगायत दलबाट स्वतन्त्र उम्मेदवारका रुपमा मनोनयन दर्ता गराएका छन् । केही दिनअघि मात्र एमालेमा प्रवेश गर्नुभएका जानकीराम साह एमालेबाट पनि टिकट नपाएपछि स्वतन्त्र रुपमै उम्मेदवारी मनोनयन दर्ता गराउनुभएको छ ।
एमालेका बयोवृद्ध नेता रामसेवक यादवले पनि स्वतन्त्ररुप मै उम्मेदवारी दर्ता गराउनुभएको छ । कांग्रेसका जनकपुरधाम नगरसमिति सभापति मनोज साहले पार्टी परित्याग गरी स्वतन्त्र रुपमा नगरप्रमुख पदमा उम्मेदवारी दर्ता गराउनुभएको छ । एमालेले उपप्रमुखमा टिकट नदिएपछि उमेश चौधरीले स्वतन्त्ररुपमा उपप्रमुख पदका लागि उम्मेदवारी दर्ता गराउनुभएको छ । (रासस)
