एभिसी सेन्ट्रल एसियन सिनियर पुरुष तथा महिला च्यालेन्ज कपको विजेता नेपाली महिला भलिबल टोलीका खेलाडीहरुलाई सरकारले नगद पुरस्कार दिने भएको छ । उज्वेकिस्तानलाई पराजित गर्दै एभिसी सेन्ट्रल एसियन सिनियर पुरुष तथा महिला च्यालेन्ज कपको विजेता बनेको भलिबल टोलीका सबै खेलाडीलाई जनही ५ लाख रुपैयाँ दिने मन्त्रिपरिषद्ले निर्णय गरेको हो ।
साबिकको च्याम्पियन समेत रहेको नेपाली टोलीले लगातार दोस्रो पटक उपाधी चुमेको हो । नेपाली टोलीका खेलाडीलाई ५ लाख, प्रशिक्षकलाई ३ लाख र अफिसियललाई २ लाख दिने निर्णय सरकारले गरेको छ । नेपालले अपराजित रहदै उपाधीको रक्षा गरेको थियो ।
नेपालले हिजे भएको फाइनलमा उज्बेकिस्तामाथि ३–२ सेटले जित निकाल्दै लगातार प्रतियोगिताको उपाधि रक्षा गरेको हो । नेपाली टोली भोलि स्वदेश फर्कँदै छ। यसैबीच राष्ट्रपति, प्रधानमन्त्री तथा खेलकूद मन्त्रीले समेत नेपाली टोलीलाई बधाई दिएका थिए ।
