नेपाली महिला टोलीले एसियन सिनियर सेन्ट्रल जोन पुरुष तथा महिला भलिबल च्यालेन्ज कपमा आफ्नो अपराजित यात्रालाई कायमै राखेको छ । नेपालले लगातार तेस्रो जित संगै आफ्नो अपराजित यात्रालाई कायमै राखेको हो । बंगलादेशको राजधानी ढाकामा आज आयोजक बंगलादेशलाई उसकै घरेलु मैदानमा ३-० को सोझो सेटमा हराउँदै नेपालले लगातार तेस्रो जित निकालेको हो ।
बंगलादेशमाथि नेपालले २५-५, २५-१५ र २५-१७ को सेटमा जित निकालेको हो । लगातारको जितसँगै नेपाल फाइनलको एकदमै नजिक पुगेको छ । नेपालले आफ्नो पहिलो खेलमा श्रीलंकालाई ३-२ सेटमा हराएको थियो । यस्तै दोस्रो खेलमा नेपालले माल्दिभ्सलाई ३-० को सेटमा हराएको थियो । नेपालले अब भोली उज्वेकिस्तानको सामना गर्नेछ ।
साविक विजेता समेत रहेको नेपालले ३ खेलमा ८ अंक जोडेको छ । आजको जित संगै नेपाल शीर्ष स्थानमा उक्लिएको छ । यसैबीच नेपालको पुरुष टोलीले अहिले केही बेरपछि श्रीलंकासँग प्रतिस्पर्धा गर्दैछ । नेपाल र श्रीलंकाबीचको खेल दिउसो पौने ६ बजे बाट सुरु हुनेछ । नेपाल दोस्रो जितको खोजीमा हुनेछ ।
