नेपालको पुरुष टोलीले एसियन सिनियर सेन्ट्रल जोन पुरुष तथा महिला भलिबल च्यालेन्ज कपमा पहिलो जित दर्ता गराएको छ । बंगलादेशको ढाकामा आज सम्पन्न दोस्रो खेलमा उज्वेकिस्तानलाई तीन एकको सेटमा हराउँदै नेपालले पहिलो जित निकालेको हो । बलियो टिम उज्वेकिस्तानविरुद्ध नेपालले पुनरागमन गर्दै उत्कृष्ट जित निकालेको हो ।
नेपालले पहिलो सेट २५- १८ ले गुमाएको थियो । तर, त्यसपछिको तीन सेट नेपालले लगातार जित्यो । नेपालले दोस्रो सेट २५-२१, तेस्रो सेट २५-२१ र चौंथो सेट २५-२३ ले आफ्नो बनाउँदै पहिलो जित निकालेको हो । बिहीबार सम्पन्न खेलमा नेपाल आयोजक बंगलादेशसँग ३-० को सोझो सेटमै पराजित भएको थियो ।
अब नेपालले तेस्रो खेलमा शनिबार श्रीलंका र अन्तिम खेलमा आइतबार माल्दिभ्सको सामना गर्नेछ । महिलातर्फ नेपालको अपराजित यात्रा कायमै ले लगातार दोस्रो जित निकालेको छ । आज नेपालले माल्दिभ्सलाई ३-० को सेटमा हराएर लगातार दोस्रो जित निकालेको हो । महिलाको पहिलो खेलमा नेपालले श्रीलंकालाई ३-२ को सेटमा हराएको थियो ।
