नेपाल क्रिकेट संघ क्यानले राष्ट्रिय क्रिकेट टिममा जिम्मेवारीलाई पुरै फेरबदल गरेको छ । यसैक्रममा क्यानले खेलाडीको केन्द्रिय संझौतालाई लिएर प्रश्न उठाएको भन्दै कप्तानबाट ज्ञानेन्द्र मल्ललाई बर्खास्त गरेको छ । क्यानको आज सम्पन्न भएको बोर्ड बैठकले मल्ललाई कप्तानबाट हटाउने निर्णय गरेको हो ।
बैठकले राष्ट्रिय क्रिकेट टिमको कप्तानको जिम्मेवारी अब सन्दीप लामिछानेलाई दिने समेत निर्णय गरेको छ । क्यानले कप्तान मल्ल र उपकप्तानबाट दीपेन्द्र सिंह ऐरीलाई जिम्मेवारीबाट हटाउने निर्णय गरेको जनाएको छ । खेलाडीको केन्द्रिय सम्झौतालाई लिएर कप्तान मल्ल सहित केही सिनियर खेलाडीले सार्वजनीक रुपमा गुनासो गरेका थिए । खेलाडीको वर्गिकरण बैज्ञानिक र व्यवहारिक नभएको मल्ल सहित केही सिनियर खेलाडीको गुनासो थियो ।
यहि बिषयमा क्यानले खेलाडीहरु संग स्पष्टिकरण मागेको थियो । तर उनीहरुको स्पष्टीकरण चित्त बुझ्दो नभएको भन्दै कारबाही गरेको हो । बैठकले केही खेलाडीले आचार संहिता पार गरेर प्रस्तुत भएको भन्दै कारबाही गर्ने निर्णय गरेको हो । यसरी काबाहीमा पर्ने खेलाडीहरुमा मल्ल सहित दीपेन्द्र सिंह ऐरी, सोमपाल कामी र कमल सिंह ऐरी रहेका छन् । उनीहरु लाई सन् २०२२ को केन्द्रिय सम्झौताबाट सुरुको ६ महिनाको लागि सहभागी नगराउने निर्णय गरेको छ ।
