नेपाली काँग्रेसको सभापतिका लागि भएको दोस्रो चरणको मतगणना सुरु भएको छ । राष्ट्रियसभा गृहमा आज दोस्रो चरण अन्र्तगत खसालिएको मत खोलेर गणना थालिएको हो । यसअघि राति साढे १० बजेदेखि नै मतगणना सुरु गर्ने भनिएको थियो । तर केही समय ढिला गरि मतगणना सुरु भएको हो ।
राष्ट्रियसभा गृहमा अपरान्ह साढे ३ बजेदेखि सुरु भएको मतदान राति ९ बजे सम्पन्न भएको थियो । अहिले भने मत गणना सुरु भएको निर्वाचन समितिले जनाएको छ । पहिलो चरणको भन्दा आज मतगणना छिटो हुने समेत बताइएको छ । मतपत्र एकै किसिमको मात्र रहेकाले आजको मतदान ३ घण्टामा आइसक्ने समितीले जनाएको छ ।
आजको मतदानमा चार हजार ७४३ मतदातामध्ये चार हजार ५६४ ले मतदान गरेका थिए । हिजोको निर्वाचनमा सभापति पदका प्रत्यासी कसैले पनि ५० प्रतिशत भन्दा बढी मत ल्याउन नसकेपछि पार्टी विधानअनुसार सबैभन्दा बढी मत ल्याउने शीर्ष दुई उम्मेदवार प्रधानमन्त्री एवं वर्तमान पार्टी सभापति शेरबहादुर देउवा र नेता डा शेखर कोइरालाबीच दोस्रो चरणको मतदान भएको हो ।
