नेपाली लेग स्पिनर सन्दीप लामिछाने आबद्द होबार्ट हरिकेन्सले बिग बास लिग बीबीएल टी ट्वान्टी क्रिकेटमा पराजय भोग्नु परेको छ । आज भएको खेलमा होबार्ट पर्थ स्कोचर्ससँग सन्दिपको टिम ५३ रनले पराजित हुन पुग्यो । पर्थले होबार्टलाई १ सय ८३ रनको लक्ष्य प्रस्तुत गरेको थियो । लक्ष्य पछ्याएको होबार्ट १९ ओभरमा अलआउट हुँदै १ सय २९ रनमा समेटिएको थियो ।
होबार्टका बेन म्याकडेरमोटले ४१ रन तथा डीआर्ची सर्टले ३१ रन जोड्दा सन्दीपले अविजित १३ रन बनाए । यस्तै टिम डाभिडले १७ रन जोडे । पर्थका ट्यामल मिल्सले ३ तथा एस्टन अगर र एन्ड्रयु टेले समान दुई दुई विकेट लिए ।यस अघि पहिले ब्याटिङ गरेको पर्थले २० ओभरमा ५ विकेट गुमाएर १ सय ८२ रन बनाएको थियो ।
पर्थका लागि मिचेल मार्शले अविजित १०० रनको शतकीय इनिङ्स खेले । होबार्टका नाथन एलिसले २ विकेट लिए भने सन्दीपले १ विकेट लिए । यस हारसँगै होबार्ट ३ खेलमा ६ अंक जोडेर पाँचौं स्थानमा रहेको छ । पर्थ १० अंक जोडेर शीर्ष स्थानमा रहेको छ ।
