चर्चित फुटबल क्लब बार्सिलोनाले टिमको प्रशिक्षकमा सेर्जी बार्जुआनलाई नियुक्त गरेको छ । तर उनी अन्तरिम प्रशिक्षक हुने छन् । बार्सिलोनाले आज सेर्जीलाई अन्तरिम प्रशिक्षक चयन गरिएको जानकारी दिएको छ ।मुख्य प्रशिक्षक रोनाल्ड कोम्यानलाई बर्खास्त गरेको दोस्रो दिन पछि बार्सिलोनाले सेर्जीलाई अन्तरिम प्रशिक्षक बनाएको हो ।
स्पेनिस प्रशिक्षक सेर्जी यस अघि बार्सिलोनाको बी टिमको मुख्य प्रशिक्षकका रुपमा रहेका थिए । सेर्जीको नेतृत्वमा टिमले प्रशिक्षण सुरु गरिसकेको समेत बार्सिलोनाले जनाएको छ । ४९ वर्षीय प्रशिक्षकले आफ्नो काम सुरु गरिसकेका छन् ।
बार्सिलोनाले बुधबार डच प्रशिक्षक कोम्यानलाई बर्खास्त गरेको थियो ।बार्सिलोनाले नियुक्त गरेको १४ महिना पछि नै कोम्यानलाई बर्खास्त गरेको हो । ५८ वर्षीय कोम्यान २०२० को अगस्टमा बार्सिलोनाका मुख्य प्रशिक्षक चयन भएका थिए।
