महेन्द्रनगर,-गैरआवासीय नेपाली सङ्घ (एनआरएन)ले कञ्चनपुरको भीमदत्त नगरपालिका–१३ का ७५ बाढी पीडित परिवारलाई सहयोग गरेको छ । एनआरएनले पीडितलाई राहत उपलब्ध गराएको हो । कञ्चनपुरका बाढी पीडितलाई एनआरएनका अध्यक्ष भुवन पन्त यहाँ आफै आएर सहयोग गर्नुभएको हो । “वडा नं. १३ का ७५ बाढी पीडित परिवारलाई राहत उपलब्ध गराएका छौँ”, स्थानीयस्तरमा समन्वय गरिरहेका कञ्चनपुर उद्योग वाणिज्य सङ्घका पूर्वउपाध्यक्ष माधवप्रसाद जोशीले भन्नुभयो, “दोधारा चादँनी र भीमदत्तको तटीय क्षेत्रमा मङ्गलबार राहत वितरण गर्दैछौँ ।”
एनआरएनका राहत वितरण संयोजक मनोज गोर्खालीले पहिलो चरणमा रु ८० लाख बराबरको राहत प्याकेज वितरण गरिरहेको जानकारी दिनुभयो । उहाँले पहिलो चरणमा पीडितको बस्तीका अति विपन्न समुदायका ३०० परिवारलाई राहत सामग्री वितरण गरिने बताउनुभयो । एनआरएनले रु ३५ हजार बराबरको त्रिपाल, लत्ता कपडा, खाद्यान्नलगायत सामग्री हस्तान्तरण गर्न लागेको छ ।
