दमौली, १४ माघ व्यास नगरपालिकाले शहीद दिवसको दिन सार्वजनिक बिदा दिने निर्णय गरेको छ । माघ ७ गते बसेको बैठकले शहीद दिवसको दिन आइतबार सार्वजनिक बिदा दिने निर्णय गरेको हो ।उक्त दिन नगरपालिकाको कार्यालय, सबै वडा कार्यालय बन्द रहने सूचना प्रविधि अधिकृत विशाल पण्डितले जानकारी दिनुभयो । नगरपालिकाले प्रत्येक वर्ष शहीद दिवसमा सार्वजनिक बिदा दिँदै आएको छ । उक्त दिन नगरपालिकाले अल्ट्रा म्याराथन गर्ने गरेको थियो । तर यसपटक कोरोना जोखिमका कारण सो कार्यक्रम स्थगित भएको छ ।
५६ जनालाई अपाङ्ग परिचयपत्र( गुल्मीको मालिका गाउँपालिकाले वडामै पुगेर अपाङ्ग परिचयपत्र वितरण गरेको छ । गाउँपालिकाका विभिन्न तीन स्थानमा सञ्चालन गरिएको शिविरबाट ५६ जनालाई अपाङ्ग परिचयपत्र वितरण गरिएको हो । पहिलो दिन माघ ११ गते वडा नं २ दर्लिङमा १६ तथा दोस्रो दिन बुधबार वडा नं ४ अर्खबाङ्गमा १७ जनालाई परिचय पत्र वितरण गरिएको थियो । त्यसैगरी तेस्रो दिन बिहीबार वडा नं ७ घमिरबाट २३ जनालाई अपाङ्गता परिचयपत्र वितरण गरिएको प्रमुख प्रशासकीय अधिकृत दीपक भण्डारीले जानकारी दिनुभयो ।
परिचयपत्र लिएकामध्ये ‘क’ वर्गका १०, ‘ख’ वर्गका २४, ‘ग’ वर्गका १३ र ‘घ’ वर्गका नौ जना रहेका छन् । ‘क’ र ‘ख’ वर्गको अपाङ्गका लागि राज्यबाट क्रमशः रु तीन हजार ९९० र रु दुई हजार १२८ प्राप्त हुने प्रशासकीय अधिकृत भण्डारीले बताउनुभयो ।
